گرانڈکرکٹ ٹورنامنٹ ونی

گرانڈکرکٹ ٹورنامنٹ ونی

فرسٹ پرائز ٹیم توراڈی انعام ایک لاکھ روپے اور ٹرافی

سیکنڈ پرائز ٹیم مہاڈ پچاس ہزار روپے اور ٹرافی

مزمل سرکھوت

ضلع رائے گڑھ کے تعلقہ مانگاؤں کے گاؤں ونی میں ۲۲ تا ۲۶ فروری ۲۰۲۱ء کوٹینس بال ٹورنامنٹ کا انعقاد کیا گیا تھا۔ ینگ اسٹار اسپورٹس ایسو سی ایشن ونی، وائی ایم سی سی ونی اور ونی گاؤں کے تمام لوگوں کی مشترکہ کوششوں سے ایک لاکھ روپے کے اول اور پچاس ہزار کے دوم انعام کے اس بڑے ٹورنامنٹ کوونی کے کرکٹ گراؤنڈ میں شاندار طریقے سے انجام دیا گیا۔اس ٹورنامنٹ میں کل ۲۸ ٹیموں نے حصہ لیا ۔ گاؤں ٹو گاؤں اور اوپن لاٹس کے تحت مقابلے ہوئے ۔پانچ دنوں تک جاری رہنے والے اس شاندار ٹورنامنٹ میں لوگوں کی دلچسپی آخر تک بنی رہی۔ہر میچ کے دوران دو بار ڈرنگس کا انتظام کیا گیا تھا۔مکمل پروفیشنلزم کے ساتھ اس ٹورنامنٹ کا انعقاد کیا گیا۔امپائر کے فیصلوں میں شفافیت ہو اس کے لیے غیر جانب دار امپائروں کو متعین کیا گیا تھا ، فیصلے میں کسی بھی قسم کے شکوک کو دور کرنے کے لیے تھرڈ امپائر اور ویڈیو ریکارڈنگ کا انتظام کیا گیا تھا۔اول اور دوم انعامات کے علاوہ ہر میچ میں مین آف دی میچ ، سیریز کے اختتام پر مین آف دی سیریز، بہترین فیلڈر، بہترین گیند باز، بہترین بلے باز نیز سیمی فائنل میں ہارنے والی دو ٹیموں کے لیے تیسرا اور چوتھا انعام بھی دیا گیا ۔ توراڈی ایک لاکھ کے پہلے انعام کی حقدار ٹیم ٹھہری، جس نے فائنل مقابلے میں مہاڈ جیسی مضبوط ٹیم کو شکست دی۔میزبان ٹیم ونی اس بڑے مقابلے میں چوتھے پائیدان پر رہی، ٹیم کے نومنتخب کپتان ثاقب سرکھوت نے چوتھے انعام کی ٹرافی حاصل کی ۔ تیسرا انعام مانجرونہ سہارا کی ٹیم نے حاصل کیا۔مانجرونہ کے فیصل سنگے کو ٹورنامنٹ کے بہترین بالر کی ٹرافی دی گئی، فائنل میں مین آف دی میچ توراڈی کے فردین نے حاصل کیا۔فردین نے سب سے دور چھکا مارنے کا انعام بھی حاصل کیا۔توراڈی کے کھلاڑی ابھیشیک آہنگے نے بیسٹ فیلڈر آف دی ٹورنامنٹ اور بیسٹ کیچ آف دی ٹورنامنٹ کی ٹرافیاں اپنے نام کرلیں۔مہاڈ کے یوگیش پینکر بیسٹ بیٹس مین کے خطاب سے سرفراز کیے گئے۔مین آف دی سیریزتوراڈی کے کھلاڑی آشیش قرار دیے گئے۔فائنل مقابلے میں مہاڈ کی ٹیم نے پہلے بلے بازی کرتے ہوئے مقررہ چھے اووروں میں ۵۰ رن بنائے جسے توراڈی کی ٹیم نے تین اووروں میں ہی پار کر لیا۔اس میچ میں فردین نے صرف ۱۳ گیندوں میں ناٹ آؤٹ ۴۳ رن بنائے، انھیں مین آف دی میچ قرار دیا گیا۔انعامات کی تقسیم گاؤں کے معتبر لوگوں کی موجودگی اور نمایاں لوگوں کے دست مبارک سے انجام پائی۔